落筆時剛完成小組頭兩輪賽事，睇到第三十六場。見蘋果波版亦有小結，講「輸死人場次」，可謂警世恒言，大家掛住度盤嘅同時，要留意吓自己點解會輸。知道自己盲點，如在同一位置再仆，此之為抵死，「人類總要重複犯錯」，麻煩落飛前自抄三十次。
買咗三屆世界盃，呢屆真係明搶錢，身邊朋友日日都瀨嘢，每日三場少則爆一場，多則爆冷三場，完全無情講。死因研究庭現將歸類：
1）冷格：意大利負哥斯達黎加、智利勝西班牙、烏拉圭負哥斯達黎加，呢幾場完全係常人都估唔到，大家攬炒，非常合理，大家死得眼閉。可悲嘅係，據聞少年食神就係中西班牙毒出事，最陰功係佢仙遊之後，西班牙就殺咗袋鼠。
2）和格：巴西對墨西哥未盡全力博和，通常發生喺強隊，第二第三輪小組賽，自己一定出線但又揸流攤摸和攞一分（又或者走線），順手幫莊贏盤，今晚G組德國美國同H組比利時，絕對有此機會。（不過德軍對住奇連士文嘅盟軍，又好難唔買多少睇呢場戲碼）
3）賤格：明明隊波未夠班，都硬係信奇蹟會出現，買個希望，眼見唔少英格蘭、日本、葡萄牙死忠，心入面明知，但照落注當畀香油，如愛情般執着，不過我欣賞你嘅堅持，個莊就更加讚賞你。
小組賽結束，今年個莊特別強硬，追走地好多時會出事，師兄弟睇路。
文：梁柏堅
識睇 一定睇蘋果嘅足動世盃：
http://worldcup2014.appledaily.com/