一手湊大萬科企業（2202）成為內房龍頭嘅主席王石，近年雖然退居二線，較少沾手公司日常營運，但噚日都有為萬科B轉H在港上市撐場，仲晨早9點已經現身交易所展覽廳。現場唔少人見到呢位內房一哥都伺機搵佢合照留念，佢又跟港交所（388）行政總裁李小加密斟。佢表面上表現得有啲嚴肅，但上台畀傳媒影相開市嗰刻，佢都興奮到攞個智能手機出嚟，跟好拍檔、總裁郁亮玩自拍，記錄呢個難忘時刻。
王石回答傳媒提問時好謹慎，多次糾正記者提問嘅字眼，例如有人問佢內地樓市泡沫幾時爆？佢就話「我只說過擔憂泡沫，但沒有講破滅」。提到內地樓市現狀，佢又可以扯到去內地有27%面積係沙漠咁宏觀，話只要喺大城市都仲有得撈。至於近日傳出因被排擠要離職嘅副總裁毛大慶，佢笑住講，現身上市儀式令謠言不攻自破。