專業界別音樂愛好者，閒時愛在資深女大狀譚允芝（Winnie）的家流連；大小提琴與鋼琴，群音起舞，歌聲飄揚。將客廳變成演奏廳，這位港大法律學院Law Anthem作曲人，一直推動音樂人生，近年更致力發掘中港澳演奏界明日之星。
為英女皇巡迴獻唱
入讀聖保羅男女書院，Winnie自此與鋼琴結緣；後來發現「自己有把聲喎」，轉而唱歌，1977年中四那一年，更代表香港巡迴英國各地演唱，慶祝英女皇登基25周年，「中學嗰七年，真係好活躍音樂生活」。
父母不是沒擔心，「有講過入唔到大學，去賣點心啦、去穿膠花啦」，倒是她自我審查：「覺得攞住咁嘅成績，如果去讀音樂，好似對唔住屋企咁；而音樂呢樣嘢，我唔使全職做，都可以做到。」
結果報讀大學時選修法律系，「但我一入到去都冇放棄音樂，一入去就指揮HKU Choir，一指指咗三年，高峯期同一時間唱五個、指（揮）三個Choir」。
Winnie讀大學三年班時，更為升格為法律學院的港大法律系創作Law Anthem；自言「沖涼都寫到兩首歌」的她，輕鬆為學院留下樂曲。
子女遺傳音樂細胞
兩名子女遺傳了音樂細胞，其中22歲囡囡剛在美國The Juilliard School畢業，是小提琴能手，師傅包括已故中央音樂學院教授、著名小提琴家林耀基；20歲的囝囝專攻大提琴。兩姊弟未到外國留學前，不時呼朋喚友在家Jam歌，「佢哋走咗後，我好miss嗰啲sound，好想聽佢哋拉琴，最後叫啲朋友一齊返屋企play」。
囡囡投考Juilliard前的準備，連曾任大律師公會副主席的她也嘆「好辛苦」。「（試過）要帶佢去Indiana（印第安納州）見一個音樂教授，搵咗學院最近嘅Motel落腳，嘩！（環境）恐怖到吖；我驚車死人，就冇揸車啦，最終行咗成個鐘都未到」。
尚未計千里迢迢之外，為女兒寫信約見教授的辛酸，是這過程令她驚覺有潛質的學生要發展音樂，沒人力沒資源，談何容易？Winnie其後與朋友成立林耀基中國音樂基金，並任副主席，今年起每年頒發有限名額獎學金，資助精英到海外升學或進修，例如參加瑞士Verbier Festival。基金歡迎各界捐助，詳情可瀏覽 http://www.linyaoji.com。
記者 許偉賢