為期十日嘅全民佔領中環投票（簡稱佔中投票）開始之後，網上投票人士急速增加，到咗六月廿九日完成投票為止，投票人數接近一百萬人都唔奇，淨係去到六月二十四日，已有73萬人在網上或投票站投咗票啦。
左丁山素來係溫和民主派，對佔中一事，無可無不可，覺得佔領中環未必可以逼到特區政府（其實係中央）讓步，但佔中對香港也不會有甚麼傷害，畢竟是集會表達意見而已，況且今次佔中投票之前，真普聯已篩選過幾個政改方案，將陳方安生、李柱銘嘅方案踢走咗，左丁山就條氣唔順啦，故此一路冇想過要投票，如果投，都會投棄權票而已。關於政改方案方面，左丁山傾向支持陳方安生方案與13學者方案，將之搓圓妥協，可與特區政府談判，大家有路行。好老實咁講，對梁振英最有利嘅政局就係原地踏步，2017冇特首普選，沿用2012年嘅選舉方式，佢可以篤定當選，而且亦會俾阿爺一個藉口，以後特首冇普選，順帶立法會亦難以全民普選。
左丁山原本唔睇好公投，認為投票人數頂多十零廿萬，點知道中共係有辦法刺激香港人上街嘅，就係首先拋出一個白皮書，繼而有不知名人士全力襲擊蘋果日報網站及網上投票網絡，中間又發動大批過氣電池與擦鞋仔嚟發言支持白皮書，指法官係治港者，須愛國，香港無剩餘權力等等，甚至乎連律師會會長林新強都肉麻當有趣咁講共產黨好偉大……如此一來，大把市民就算唔鍾意激進民主派，都激氣到要行出來投票，以示抗議中央之高壓手法，左丁山身邊嘅人大都如此，呢次公投或可視之為不滿北京氣焰嘅抗議行動。特區政府與中央嘅反應當然係口徑一致：公投非法，公投冇法律效力，公投係鬧劇，人數之多係造馬造假而來，最後就由經常理曲氣壞嘅「環球時報」講：「幾十萬人有乜叻，中國有十三億人。」鬼唔知中國有十三億人咩，「環時」夠唔夠膽呼籲13億人與香港七百萬人一起投票吖？試吓准許13億人公民投票嚟決定中共是否可以永遠一黨專政吖，理屈辭窮之餘，又會話外國勢力搗蛋，背後操控，呢啲說話講咗二十幾年，一成不變，左派啲文宣大員，腦筋何以如此懶惰？