雖然姊妹公司香港航空發生「800蚊強國客」事件，但唔影響廉航香港快運繼續搞搞震。公司搞咗個機隊命名比賽，超過一千名市民參加，最後「點心」系列脫穎而出，第一架叫「燒賣」嘅飛機噚日起飛。
快運計劃，將機隊入面5架A320空中巴士飛機，以一盅兩件嘅點心命名，首粒「燒賣」啱啱啟航，其餘4架「珍珠雞」、「馬拉糕」等陸續有嚟。唔止飛機個名叫燒賣，乘客仲可以訂點心飛機餐，好似點心拼盤、煎釀三寶等，充滿本土特色。
唔少廉航都鍾意搞飛機命名比賽，當係宣傳吸客。好似新加坡酷航幾部飛機叫Barry、Big Yella Fella（黃色大個子）、Goin' Scootin'等；日本樂桃就從一個嚟自福島嘅中學生上，揀咗「東北之翼」呢個咁有意思嘅名。