港視藝人羅貫峰同太太已有兩歲囝囝羅俊洛，兩公婆去年底又再造人成功，話咁快細仔噚日凌晨就出世，重6.4磅，母子平安。兩個仔嘅生肖正好係「龍馬」組合，羅貫峰話兩個夠晒數。
羅太原本預產期係下個月，佢前日突然作動入院待產，羅貫峰噚日凌晨接到醫院電話，BB未等爹哋入產房就搶閘出嚟。
再為人父嘅羅貫峰難掩興奮，噚日喺電話度話：「趕唔切見證，我入到去，BB已經喊緊。呢幾日我都擔心到失眠，𠵱家BB出世，我先鬆一口氣。」BB輪廓分明，半夢半醒下仲係咁伸脷，非常可愛。
生兩件都未開台
羅貫峰仲話：「過兩日我哋湊BB返屋企，到時就順便用細佬名義送禮物畀哥哥，等佢唔好呷醋。」兩年前，羅貫峰大仔出世，佢啱啱過檔港視，𠵱家細仔出世，港視仲未開台，羅貫峰同港視合約到出年就完，冇工開嘅日子佢就打理食肆同酒吧，佢話：「決定生多個，我哋計好晒條數，生活負擔得嚟。點都好，我始終支持香港多幾個電視台，觀眾多啲選擇，同業又多啲機會。」
撰文：馮仁昭
識睇 一定睇蘋果嘅足動世盃：
http://worldcup2014.appledaily.com/