伯南克唔做聯儲局主席之後，算係俾面新主席耶倫女士，「過冷河」三個月先至接演講柯打，由代理人安排與大銀行嘅客戶吃飯。佢嘅前任格林斯潘落莊後只係等咗一個月，就急不及待咁出山收演講費、出席費咯。咁又難怪嘅，佢地最多時興兩年，過咗一段時期，離開聯儲局太耐嘅話，佢地就變番係普通經濟學教授啦，點可以收取高昂演講費，故此佢地有一個公式，就係離職後快快拼命爭取演講，年幾兩年後就出版回憶錄，取回一筆稿費版權費，然後就恢復普通人生活，得大銀行聘請嘅，自然出任高薪厚職，好似蓋特呢啲咁依家咪係Warburg Pincus（大型私募基金公司）嘅總裁囉。
呢類美國高官搵真銀嘅做法，唔算貪污，但以香港標準，就算係利益衝突，「延後利益，官商勾結」，故此香港官場嘅水平，表面上高於美國，直至有貪污案件爆內幕曝光，大家睇到報導為止。
美國官場貪污，在地區層面不時發生，例如芝加哥，但在聯邦政府中央層面，就比較罕見，大官都係領取比商界低好多嘅薪水，比香港、新加坡對等官員低好多嘅薪水，為人民服務嘅，但一旦退職，就可利用當官時候建立嘅政治網絡，到商界搵真銀或者收取高昂演講費，此乃所謂美國的「制度安排」（institutional arrangement），合乎美國社會法律及文化。
中國何時方有同類「制度安排」，減少官場直接貪污？諗深一層，若無一個定時更換政府，政黨輪流執政嘅民選制度，而係永遠一黨專政嘅話，民企無論幾壯大，隨時可以俾黨中央揑死，俾黨政機關高官玩殘，啲高官駛乜謙卑到要在退休後先至出席演講會呀？當官時唔收到盡嘅話，人走了就茶涼，還有誰會俾面？美國官商旋轉門嘅制度安排，要在一黨專政嘅中國土地生根，難過在沙漠種花種菜，是故要根絕中國官場貪污與特權，係體制上不可能嘅。中國自習李上台以來，不斷宣傳反貪腐，反奢華，尚樸素，係在中國講嘅啫，最近李克強訪問英國，英方在希斯路機場鋪紅地氈接機，中方人員事先審查程序細節，就發覺紅地氈短咗三米，要唐寧街十號更換，幾要威呀，不過英方詐詐諦諦冇換到地氈啫。