祥Hi：福嬸，畀碟乾炒牛河同凍奶茶，行街啦唔該！
福嬸：咦，唔喺度食啊？
祥Hi：今晚想返屋企食。
福嬸：做咩？做咗虧心事啊？個樣咁驚青嘅？
大鍋：福嬸，埋單。喂，祥Hi，噚日你又同我講荷蘭（圖）實開「大」嘅？
祥Hi：吓，係啊，大鍋哥，爭少少啫，爭少少開到「大」。
大鍋：又係你話呢啲波爭首名通常會係咁攻，我信晒你，買咗成千蚊，𠵱家得個桔。
祥Hi：大鍋哥，賭波實有輸贏㗎啦，我都冇諗過你會買咁多。
大鍋：唔係喎，你噚日叫我瞓身㗎喎！
祥Hi：我成日同肥頭佢哋傾波，都係咁講，但唔係真係叫你要攞晒全部錢去買！
大鍋：早知我聽我個兄弟講，佢話天氣熱，啲球員唔適應，已經連續幾次早場開「細」，叫我買，但我諗住你賭得多過佢，所以信你。唉，算啦，當我黑仔，你下次咪再行過嚟話有咩貼士。
（大鍋離開茶餐廳）
福嬸：唔係嘛，祥Hi，你累大鍋哥輸錢。
祥Hi：贏梗㗎咩，我夠輸啦。
德叔：好心你自己咁屎，就咪鬼亂畀貼士啦，雖然冇話包中，但我哋就話冇問題箒，大鍋哥你又唔熟，就唔好啦！
福嬸：不過，大鍋哥又真係冇乜腦，人叫佢買咩就買咩！
德叔：好多人就係咁啦，以為有金執就去執，好似玩股票咁，自己唔識，最好咪掂，自己有研究先好去玩。
福嬸：哈，德叔，你平時都唔多睇波，咪又買波！
德叔：祥Hi，你碟牛河仲行唔行街啊？
識睇 一定睇蘋果嘅足動世盃：
http://worldcup2014.appledaily.com/