之前講過日本、南韓同埋澳洲，咁就唔爭在介紹埋伊朗啦，呢支亞洲「1哥」其實來頭唔細，喺外圍賽不但首名出線，仲入咗30球。如果大家有睇伊朗對阿根廷嘅比賽，伊軍守到91分鐘先失波，而且有唔少比阿根廷更具威脅嘅攻勢，嚇到阿軍嘅球迷心驚驚，相信無論伊朗最終出唔出到線，都已經令人留下深刻印象。
高查尼赫特夠瀟灑
伊朗隊長尼古納姆身穿6號球衣，為球隊喺中場創造咗大量機會，雖然已經33歲，但控制比賽節奏及聯防指揮上仍發揮英雄本色，而且遠射能力唔錯。上場比賽差少少就入兩球嘅前鋒高查尼赫特（圖）都一樣嚇人一驚，可能喺查爾頓日子有功，佢接應傳中能力強，而且揳位靈活。可惜喺前線通常支援較少，以致仍未取得首個世界盃入球。兩位主力有一副伊朗俊臉，輪廓深加埋粗眉同鬍鬚，真係幾瀟灑㗎！
幾時會「拉布」？
球賽中嘅「拉布」係指球隊採取拖延時間嘅手段以保勝局，例如去角球旗附近控球在腳。今晚伊朗一旦有機會領先波斯尼亞，為求出線資格都可能會拉一拉布。
陳婉婷
太陽飛馬助教
識睇 一定睇蘋果嘅足動世盃：
http://worldcup2014.appledaily.com/