原來好多人都以為今屆世界盃場場免費播，就連我嘅女神阿Sa（蔡卓妍）都響微博鬧爆，話自己難得喺香港約班friend返屋企開P撐阿根廷，點知開着電視至知無得睇，當堂咩面都無晒，惟有夾硬畀錢開台睇波。
講真，分組賽開始時場場免費播，大家就自然留喺屋企由12點睇到朝早6點，放假嘅話更可以即時瞓番個好覺，你話幾爽啊！但到分組賽第3輪嘅戲肉就唔同講法嘞，如果屋企冇裝收費台嘅一係就畀錢睇，唔係等到8強都有部份免費嘅，總之4強開始先再免費任你睇，呢個安排真係搞到啲人又躁、又無奈。
我同啲朋友都係冇收費台嘅一群（圖），試過去商埸睇，但去到已經好鬼多人，逼到企都無碇企。睇波睇到咁辛苦，真係無謂；諗住轉場去茶餐廳咩，去到又係爆，最後只好無奈返歸。輸咗嗰次經驗之後，仲唔醒目咩，一早去茶記食定晚飯霸定位，咁就sure win啦！不過長此下去，唔使等熊貓快閃啦，我哋啲球迷咪做晒熊貓囉！
文：許家樂
識睇 一定睇蘋果嘅足動世盃：
http://worldcup2014.appledaily.com/