問：邊個話有民主，香港就會比依家更好？
答：民主好似空氣，吸得多唔可以保證你會變大隻同埋長命，但如果無空氣，或者唔夠空氣，保證你會活得好辛苦。
問：大陸都無民主啦，你睇啲自由行買嘢買得？
答：你有錢可以買氧氣樽就當然可以係霧霾嘅環境生存啦，無錢嗰啲，咪要食臭腳米粉俾城管毒打同埋軟禁係屋企囉。「讓一部份人先有氣唞」，你係先定後？
問：其實同外國比，香港已經好幸福。
答：同地踎大牌檔相比，呢間餐廳有冷氣，算唔錯，你點解仲要投訴杯水有條毛呢？你要求加人工，老細話，隔籬公司全體減薪，我地唔駛減，已經好好，你會唔會接受啊？
問：全民公投呢啲係非法行為，中央同特區政府都唔會承認。
答：首先唔好自抬身價，特區政府都係跟中央政府口水尾，唔好扮自己有話事權，老實一句「特區政府緊跟中央政府立場」咪算囉。再者，你話公投係非法，咁你做乜唔拉佢地啊？縱容罪犯？曾偉雄你點做嘢㗎？
問：我嘅意思係，公投無法律效力！
答：你阿媽講嘢都無法律效力，你係咪會話你阿媽係「非法」啊？係咪你阿媽叫你孝順父母，你當佢耳邊風啊？民意調查本身亦無法律效力，咁不如叫中央政策組唔好再浪費金錢做呢啲非法行為啦。
問：基本法已經講得好清楚有普選，點解香港人唔可以袋住先呢？
答：你要石斑，俾咗條紅衫，仲要俾人吮過嘅，然後侍應話，食住先，廚房忙緊，遲啲上條深海大龍躉。大佬，你信唔信啊？袋住先，邊個保證之後一定會有呢？一陣又話呢個係客客氣氣，我地咪再做多次傻仔？