澳門房產股德祥地產（199）股價再創三年新高。要煲，繼續煲保利達資產（208），喺對上兩年，集團澳門預售200億銀，肥仔水。
保利達家陣喺澳門黑沙環新鎮海區，揸咗東方明珠區P，同T+T1地段兩幅靚地皮，應佔樓面770萬平方呎。保利達上年度年報中講，喺過去兩年，集團澳門房地產預售，每年超過100億銀，計計條數，單係預售，保利達等入賬分部，亦即係潛在現金回籠，起碼過170億銀，係集團家陣總市值53億銀嘅3.2倍！
受惠港珠澳橋通車
呢兩幅地皮嘅位置，坐正澳門港珠澳大橋落腳地點，而大橋預計在2016年建成通車，照計，待售住宅部份，只會越賣越好價。又連埋樓面近93萬平方呎嘅商業項目，好肯定將會水漲船高，保利達分成同增值，超級和味龍。
真係好保守重秤成壇製作，保利達每股係咁意可以增值/獲利3蚊，到5.5元，現價（1.22元）PB得0.22倍。
另一方面，保利達上年將哈薩克斯坦嘅油田項目撥備減值2.96億銀，純利大縮水到得番438萬銀。但呢吓狠撥得好，免除石油項目日後拖拖拉拉，影響整體業績。
上邊澳門房地產項目，雖則要到2017年先開始入賬，但保利達阿媽九龍建業（034）揸咗保利達超過70%權益，對保利達有冇特別甜品派送，仍然有憧憬。所以，每半年同年度成績單嘅春秋二祭，都有得諗。
煲保利達，用家陣PB 0.49倍做參考，保利達PB上到重秤NAV水位，要見2.7元，現價最少翻一番。又短打計數，博保利達好似德祥地產咁，向上衝頂，上返2009年高位1.9元，要翻半番樓上，到時，PB仲係得0.35倍。
錢雋
細價股專家
本欄逢周二、三、五刊出