1,600隻紙糊熊貓終於唔再快閃，今起至下月17日會坐定定，喺中環鴨巴甸街PMQ元創方畀市民影相，等參觀者更加關注全球大熊貓只剩番1,600隻，極需要各方保育嘅議題。
中央四年前送畀澳門嘅大熊貓女「心心」日前英年早逝，紙糊熊貓之父Paulo Grangeon噚日出席開幕儀式時都話，佢知道咗後都好唔開心。「心心」嘅離去，對佢個紙糊熊貓計劃有直接影響，Paulo慨嘆：「已經不是1,600隻，要改為1,599隻了。」
紙糊熊貓就擺喺元創方地下，免費入場任睇任影。元創方總幹事曾昭學話，每日可接待2、3萬人入場，已有逾20萬人網上登記參觀，佢哋可按獲指定時間去；不過市民亦可walk-in入去，但如果入面太多人，就要喺外面排隊等候。
地下啲紙糊熊貓只能睇，想抱抱熊貓就要到專區。如果想將佢哋帶番屋企，就要先喺今日中午12點至29日午夜前上網登記，獲抽中並於下月10日前成功付款，就可以喺下月23至26日到PMQ領取啦。每隻領養價200至450元，所有收入會捐畀世界自然基金會（WWF）。
馬泉崇攝
識睇 一定睇蘋果嘅足動世盃：
http://worldcup2014.appledaily.com/