比利時國王菲利普同皇后瑪蒂德遠道去咗巴西，仲喺周一入咗馬拉簡拿球場睇佢哋對俄羅斯嘅賽事。雖然隊「歐洲紅魔」都唔係踢得好㗎喇，不過都總算生生性性，靠小將奧歷治喺最後階段入波，僅僅贏1:0，冇令國王同皇后失望。賽後一眾球員得到國王皇后嘅接見，不過就搞出笑話。
比利時本身就係一個多種族國家，今屆嘅大軍名單入面都有好幾個係黑人，不過大部份都混咗其他種族嘅血統，所以唔算好黑。而兩位前鋒線嘅新星：盧卡古同埋啱啱入波嘅奧歷治，就算係比較純種嘅非裔黑人。
誤以為係入球功臣
奧歷治咁叻仔，親眼目睹佢入波嘅皇后就梗係要去讚吓佢啦，尷尬嘅事情就發生嘞！瑪蒂德皇后認錯咗盧卡古係奧歷治，盧卡古本身呢兩場發揮已經差㗎啦，今場俾個新人搶晒風頭，皇后仲要認錯咗佢，真係瘀爆。佢惟有死死氣指住奧歷治同皇后講：「我唔係入波嗰個呀，佢先係呀。」唔知經過呢件事，「新魔獸」有冇後悔放棄咗佢個辮仔頭呢？不過如果佢識做嘅，就認咗係奧歷治咪算囉，當眾落皇后面，好彩皇后唔似得方丈咁小器啫。話時話，隊中嘅費蘭尼同韋素都係爆炸頭，皇后小心認錯喇！
「萬能鍾」錯得仲離譜
不過其實好多時啲球員真係幾難認，年中都考起唔少人。好似「三色台」嘅台柱「萬能鍾」，喺之前科特迪瓦對哥倫比亞嗰場，謝雲奴入波之後，都認錯咗佢係杜奧巴，要佢啲拍檔更正番。而喺冇着波衫嘅情況下，我求大俠從未試過分辨出前德國隊長波歷克同影星麥迪文。
識睇 一定睇蘋果嘅足動世盃：
http://worldcup2014.appledaily.com/