有AO歌王之稱嘅民政事務局常任秘書長楊立門，下周一趁54歲生日，告別卅幾年政務官生涯，但放埋一年假先正式脫離政府。食咗長生不老藥嘅Raymond話，查實54歲一啲都唔後生；既然阿仔大學畢業做緊嘢，係時候趁行得走得發展個人興趣，包括「以更專業嘅姿態」唱歌。
參加過第一屆新秀歌唱大賽嘅佢一直有學聲樂，自信唱歌有番咁上下水準，唔排除喺網上發歌、甚至搞慈善演唱會，對任何登台慈善籌款無任歡迎。佢稍後亦想幫政府兼職做繙譯，等大家仲聽到佢把靚聲，但退休後短期內唔會做全職。專責文化體育政策嘅佢臨別向無綫送「揪」波，回應記者提問時話，電視台應該免費播晒世界盃64場賽事。 外界盛傳佢同前上司林鄭月娥不咬弦，Raymond堅稱傳媒「煲大咗」，佢同時大讚現上司曾德成係君子，「唔係抓細微嘅嘢」。
【我撐公投】網頁:
http://622popvote.appledaily.com