噚日有報道話致富證券為谷客戶入飛認購某隻新股不惜倒貼，以500元超市禮券誘客，致富發言人回應話係一場誤會，強調冇踩界，優惠只係為宣傳，唔係針對某隻股票。公司亦因此惹來麻煩，因禮券只提供畀特選客戶，噚日就有好多客打電話去問佢哋點解冇份!
報道指，致富上星期喺某隻新股未招股前出手吸客，但要隻新股認購足額先可以收到禮券，懷疑有違證券條例。
致富承認有送出超市禮券畀客，冇話係咪豪派500元禮券咁多，但絕對冇cold call，亦唔係針對某隻新股，而係一堆股票都有優惠，而且只會選擇性提供，目的只係想吸客，「好似用開白表黃表嘅，咪用嚟鼓勵佢哋用電子認購」。
佢估計，可能係有客問有乜新股好抽時，職員嘅回應引起誤會，𠵱家仲搞到客戶以為人人有份，好麻煩。