世界盃踢到第三輪分組賽，當球迷睇到欲罷不能時，無綫就吊住你胃口，同你講 「有錢有波睇，冇錢請返歸」。在商言商，無綫用4億元投轉播權實無可厚非，仲唔趁世盃硬掘你一筆咩？
無綫除咗第三輪分組賽外，16強及部份8強都冇免費。由今晚起計未來共有23場冇得睇。咁買唔買plan呢？未來有唔少賽事時間重叠，睇到盡都係睇得16場。假設你揀瞓覺，未到四強前你都只係會睇凌晨12點場波，咁就更加只係得7場冇得免費睇。呢7場你可到去茶仔消費40蚊，花你280蚊；去apm就更加只花交通費。第二平係買tvb個手機睇波app通行證，個別台用家270蚊。你可能會嫌芒細，但如你有Apple TV，或電視做到mirroring功能，睇波一樣清！如果你係now高清客，咁就最着數，未來兩年每月加10蚊就得，總數240蚊。唔係高清客就每月加34蚊，同樣綁2年。呢個plan太唔抵，咁嘅情況，會寧願畀444蚊一炮過買三個月嘅組合，仲送埋app嘅通行證。對超級球迷來講，於電視冇mirroring功能，呢個已係相對好嘅選擇，至少佢講明三個月後唔會自動續約，唔使煩。至於點解由頭到尾冇講直接申請無綫收費電視？如果有線係希特拉都cut唔到，咁無綫就係上帝都cut唔到。如果你接受到兩年後俾無綫糾纏一輪，否則都唔建議裝。點解我知？因為我試過。
Fifi
http://www.facebook.com/lovefrystock
本欄逢周二、四刊出