今屆世界盃，幾支非洲球隊踢出嚟都唔失禮。而喀麥隆隊內嘅打交加上桑治嘅暴力紅牌，令人睇到O晒嘴嘅同時，就凸顯咗另一支非洲雄師科特迪瓦嘅可愛同專業。暫時1勝1負嘅科特迪瓦，今晚將全力爭取歷史性出線16強。
超級萬能key
講起科特迪瓦，你一定要識唱「杜奧巴，很想去捕捉他」，亦都因為呢首歌傳咗去日本隊，所以喺杜奧巴（圖）後備入替之後，整條日本後防都掛住要捕捉佢，分散晒注意力，帶嚟兩個令科特迪瓦反勝嘅入球。杜奧巴雖然年紀大，不過依然有火有風采，男人味十足，烱烱眼神已經令人膽戰心驚，今晚可能喺前線再次拯救球隊。
仲有中場9號球員迪奧迪，兩場比賽都係全場交出最多成功傳送嘅球員，幫隊友鋪橋搭路一流，呢種有義氣嘅男人不得了！
越位？聽完就算
相信大家睇波都成日聽到旁述講「恰西」，其實係源自英文嘅offside，即係越位嘅意思，越位點解？問吓屋企嘅男人啦！雖然聽完可能好快唔記得，但至少世界盃嘅知識又多啲嘛！
陳婉婷
太陽飛馬助教
識睇 一定睇蘋果嘅足動世盃：
http://worldcup2014.appledaily.com/