你可以講得出立法會所有議員的名字嗎？ 如果你可以，好嘢，你已經比99.99%的港人更了解香港的事。
你知道吳亮星係乜水嗎？我總算是1999至2000年立法會議員助理協會主席（據聞呢個會已經處於可有可無狀態），我只可以說我聽聞過吳亮星這個名字，再多的，就只有「中資銀行」這四個大字金漆招牌。
我不是支持或反對新界東北發展，但我對香港傳統的制度，有一點點留戀。吳亮星呀，吳亮星，假如你冇能力駕馭議會，收皮係最好選擇。毛主席教落，霸住茅坑唔爆石，要攞去批鬥㗎！你唔贊成呢種諗法？咁你即係否定毛主席定落嘅革命路線囉！你同張曉明傾好未㗎？
支持新界東北與否，係一件事。係唔係支持你做財委會主席，係另一件事。你大大話話響呢個圈子撈咗十幾年，竟然少少議會常識都冇，係唔係影衰成個香港財金界先？冇能力，唔好做囉，冇人會記得㗎！
我知道北京好信你，不過，香港銀行界信唔信你先？Sayonana啦，腳痛又好，頭痛又好，畀個下台階自己，好來，好去。我不嬲都唔鼓勵呢啲下台呀，換人試吓呀，激進又唔環保嘅立場。不過，見到閣下完全冇能力駕馭一個廢廢哋嘅立法會財務委員會，將小事化大，我就覺得你要反省吓。
香港嘅銀行界，亦都係時候諗吓，點解要搵個能力不足嘅人代表行業。你哋可能覺得自己有條線直通政府，連中央都有Direct line，不過，可唔可以搵個四正少少嘅代表香港財金圈？老老實實，一個唔覺意，社會棟樑當呢條蛋散係資本主義代言人，本少爺要做多好多嘢。跪吓你哋，拜吓你哋，下一期搵個質素好少少嘅代言人啦。
最後，我要加一句：「共產養懶人。」隨口講吓，自行對號入座，係閣下個人形象低落，與本少爺冇關。
利世民
http://www.facebook.com/leesimon.hk