證監會喺金融海嘯之後，成立投資者教育中心（IEC）旨在加強投資者教育，希望市場上唔好有咁多羊生、羊太，呢個中心2012年底正式成立，至今成立一年半左右，最近宣佈換上第二位總經理李博衞（David Kneebone），即日生效。
IEC令人最有印象嘅教育活動，應該係舊年中搵藝人歐陽震華（Bobby）扮《三國演義》裏面嘅諸葛亮拍宣傳片，叫人投資前要諗清楚。管理層比較低調，估唔到前總經理黎昊華做咁短時間就走。
李博衛加盟前，曾經喺新西蘭金融知識和退休收入委員會擔任執行董事，呢個委員會負責統籌新西蘭嘅全國金融理財知識同能力策略，提供免費、獨立嘅財務資訊，改善新西蘭市民嘅財務狀況。有咁嘅背景，唔知David能否改善港人嘅財務狀況呢?