近期嘅世界盃熱潮除咗響巴西打得火熱外，我哋香港呢邊都有一籮籮嘅活動，講到至Hit嘅應該係8個放響尖沙嘴天星碼頭嗰邊嘅大型球星公仔嘞。
喺Instagram都已經見到好多friend去咗影，睇到我都心郁郁，早兩日忍唔住去朝聖，啲公仔同響廣告睇到嘅幾乎一樣，而嗰日就好多人爭住同C朗影相，我梗係唔執輸影返張先，不過尼馬（圖）至係我嘅目標。畀啲貼士大家，如果要影晒咁多個公仔，最佳拍攝位置就喺5支旗桿度；想特別啲就可以企響商場門口嘅高位影番落去，8大球星加埋蟻一樣嘅路人，真係特別有feel。
至於分組賽到咗最緊張刺激嘅關頭，爆冷都係常識吧！今晚唔黐實個電視又點算球迷呢？雖然英格蘭提前出局，但我點都會捧場，記得佢哋首場對意大利就有4個老抽，希望最後一場個個上晒力啦！其實我都試過踢波爭出線，開波前個個睇死我哋輸硬，但波係圓嘅呢個道理你無理由未聽過，最終我哋憑傲氣、硬漢子，拼盡之下真係贏咗，所以英軍就算爭唔到出線，都要爭番啖氣呀！文：陳子樑
識睇 一定睇蘋果嘅足動世盃：
http://worldcup2014.appledaily.com/