【尖沙嘴】趙雅芝同黃錦燊嘅27歲細仔黃愷傑（Wesley），遺傳咗爹哋媽咪嘅優良傳統，唔入娛樂圈真係有啲嘥。擁有爆肌身材嘅Wesley，打算挾「星二代」之名殺出一條星途，佢日前就喺尖沙嘴密會英皇前高層周柱輝，據知Wesley已為入行做好準備，打算同其他星二代拗手瓜。
當日下晝3點幾，着住緊身上衣嘅Wesley，同阿輝喺一間意大利餐廳密密斟，佢哋傾咗成粒鐘，期間阿輝不時指手劃腳，Wesley則間唔中回應一兩句，佢全程聽多過講。兩人埋單後再到下層嘅HMV，佢哋入咗去放電影DVD層架嘅位置係咁兜圈搵，似乎想搵心水影碟，但最後未揀啱，空手而回。
文武雙全愛演戲
其實Wesley喺北京電影學院修讀碩士課程就快畢業，佢身手唔錯，唔只打得，仲有八級鋼琴技巧，文武雙全，之前都參演過《對不起，我愛你》、《不朽的時光》同《珍珠島的天空》幾部電影，最近又同林保怡合作過電影《按摩師》，Wesley仲喺戲度扮警察。
阿輝日前喺電話訪問中話：「Wesley今個月就喺北京電影學院畢業，之後佢會返香港住，𠵱家係朋友式幫佢。佢係新人乜嘢都想試，比較鍾意演戲。」
採訪：小米
攝影：梁繼光、畢紹基
【我撐公投】網頁:
http://622popvote.appledaily.com