世盃嘅魅力真係唔講得笑，世界職業桌球壇就有一班死忠粉絲，就算今次巴西世界盃撞正世界排名賽，都照樣喺凌晨睇波。亞洲代表有中國嘅丁俊暉同香港嘅傅家俊（Marco），小丁喺西班牙出局後轉軚捧法國，Marco就出錢出力，喺微博送獎品同球迷玩轉世界盃！
寫詩形容C朗反應熱烈
今季職業桌球賽上個禮拜二（17號）喺宜興開賽，緊接係𠵱家打緊嘅無錫精英賽，Marco都有份參加。但比賽歸比賽，學Marco話齋，4年一次嘅世界盃好難忍住唔睇，佢仲由上禮拜四開始，喺微博同粉絲一齊估賽果，打頭陣喺估上周（20號）凌晨3點英格蘭對烏拉圭嘅比數（編按：烏拉圭最終贏2:1），5個估中嘅得獎者獲得Marco嘅親筆簽名相，結果有700幾人參加。唔知係咪估比數玩得開心咗啲，就算第二朝早要打宜興站第3圈比賽，嗰晚佢都照睇波，最終就輸波而回。
世盃揭幕前貼東道主巴西捧盃嘅Marco，上禮拜六開始越玩越大，送出5支各價值3,000蚊人仔嘅鯊魚球杆，畀估中阿根廷對伊朗，同德國對加納兩場戰果嘅fans，結果吸引逾3,000人參加，但就得一人估中。噚日換玩法兼加推獎品，除咗鯊魚球杆外，仲加送自己簽名相，叫粉絲寫一首短詩，描述葡萄牙對美國中嘅C朗，700幾個回應中有啲寫：「髮型一絲不苟，觸球一腳進網」、「翩翩紅衣少年郎，崢嶸歲月汝稱王」；好彩Marco睇還睇，噚日無錫首圈比賽，佢以5:2勝英格蘭嘅史德文。
小丁轉軚捧法國
至於小丁，上禮拜六捧走宜興站冠軍獎盃後，可以專心睇世界盃，因為佢入唔到無錫決賽周。佢好搞鬼，喺英格蘭第一場分組賽輸畀意大利後，就上載咗張奧蘇利雲06年着英格蘭波衫踢波嘅相，仲講笑話：「英格蘭輸波原因搵到啦。」幽「火箭」一默後，佢原本捧衞冕嘅西班牙，點知狂牛出局後見到法國大勝瑞士5:2，於是轉軚捧法國，學佢話齋，世界盃都係睇熱鬧，唔使咁認真嘅！而唔少英倫球星，好似艾倫同禾頓都估有美斯助陣嘅阿根廷捧盃。
識睇 一定睇蘋果嘅足動世盃：
http://worldcup2014.appledaily.com/