炒股發達，我見過；但賭波賭到發達，我未曾見識過，輸到破產燒炭亡就多到數唔晒。四年一度的世界盃，部份球迷再次波神上身，一心以為「唔賭唔知時運高」，結果如何？筆者心血來潮，統計過去兩輪分組賽共32場，撇除四場平手盤（即馬會認為雙方實力均等），28場波裏分別長買實力較強及被睇低的一隊，以及在讓球情況下，長期買強隊以及弱隊，結論是贏波冇好報、輸波渣都冇。
今屆長捧熱門要輸錢
以每注100元，由揭幕戰至第二輪共28場賽事，每次必買強隊贏，共贏了15場，淨賺823元，當中如巴西對克羅地亞、荷蘭對澳洲，100蚊淨贏21蚊及19蚊，阿根廷補時先贏到伊朗，飽食驚風散下，100蚊賺得6蚊。回報6%換來100% total loss，值得嗎？計埋其餘13場強隊爆冷和或輸，蝕1,300元，到頭來長捧熱門齋勝倒蝕477元。齋買強隊勝，賠率冇肉食，有人會問，買讓球強隊勝，賠率較高，應該有賺吧？結果是只有12場全贏（淨賺993元）、4場輸半注（蝕200元），12場全輸（蝕1,200元），最終輸407元。
無可否認今屆世盃爆冷賽事頻頻，長買被睇低的一隊贏有冇着數呢？用同一套方法每注買弱旅勝，合共贏了7場淨賺2,630元，即使輸了21場蝕2,100元，埋單仍賺530元。用總成本2,800元淨賺530元，回報率19%。
另在強隊讓球下買弱隊勝，有13場全贏（淨賺1,247元）、5場贏半注（淨賺231元）、輸十場（蝕1,000元），埋單淨賺478元。回報率17%。並不是鼓勵大家賭波長買下盤着數，只是想帶出賭波值博率比買大細為低。太多人講賠率有幾好，但馬會的賠率永遠唔會死錯人。踢波踢到最後一分鐘都存變數，睇錯邊就total loss。炒股同賭波同樣都是計值博率，但除非買錯做假數股要長期停牌，股價縱使落後坐艇，但股票一日未沽，你仍有希望追得返。遇上好股長揸你可以贏一倍就走，甚至贏夠十倍先走，主動權在你手裏。買波賭身家，贏波冇好報、輸波渣都冇。
王昇
https://www.facebook.com/stockwing1
本欄逢周二刊出