唔少藝人都鍾意買磚頭保值，女歌手容祖兒亦唔例外，一向有買樓投資。華華聽聞，祖兒揸住件松柏新邨單位，最近有新租客租咗。
呢個單位係D座，喺正祖兒住嘅C座隔籬，個單位喺高層有成2,700呎，實用面積都有成2,363呎，內櫳夠晒實用同寬闊，原本聽聞每月叫租9萬元。後來，商議過後，減到去月租8.3萬租出，實用呎租都要35元。
松柏新邨呢個老牌豪宅，租盤唔多，成個市場只得3至4個，新租客好似鍾意個單位有裝修，所以扑鎚租咗。
呢個單位喺田土廳顯示，容祖兒同埋媽媽余金鳳喺2009年用公司名義以3,579萬元買入，𠵱家市值已經超過6,000萬元，收租息率都有兩厘七。睇嚟天后唔單止歌藝強勁，投資都有一手。