民生國際（938）建議削減股份溢價，似為派送甜品同分拆珠寶業鋪路，嚟緊嘅日子，仲博民生俾電貿大哥大𥄫中，民生有得炒幾味。民生上周公佈，建議削減股份溢價，兼將會舉行EGM通過。又公告講明，民生今年提出分拆珠寶產品採購、加工等等業務上市，若果分拆真係落實，集團將會向股東以實物分派分拆業務股份。民生分拆再有眉目，兼可能有甜品派送，已經有point炒。
隨住分拆呢壇製作完成，民生業務架構變得好清晰，獨沽一味主打浙江諸暨山下湖嘅珠寶城商貿物流項目。
而集團上年年報亦講明，正計劃展開珠寶城第二期工程。新一壇製作，有冇額外資金需要？若果有，民生又以乜嘢方式進行？
民生老闆為鄭松興，鄭生兼任華南城（1668）聯席主席。後邊華南城，今年頭俾騰訊（700）𥄫中入股，身價唔同晒，股價亦翻咗一番。而上邊民生諸暨珠寶城，亦係對外輻射60幾個國家嘅珠寶重鎮。講物流concept，民生一樣強，又連埋華南城經驗，民生一樣有機會俾超級大孖沙𥄫中。
PB僅0.78倍
美銀美林上個月尾發嘅研究報告，以佢所cover嘅物流股做參考，華南城家陣1.44倍PB、深圳國際（152）11.1倍、嘉里物流（636）1.5倍，同海爾電器（1169）5倍。民生最新PB得0.78倍，平咗一大截。呢轉冷灶煲民生，博上番NAV 0.73元，現價（0.57元）要翻四分一番。民生PB，未及上邊任何一間物流股嘅水位，又比起鄭生2012年增持價1.02元（總增持成本1.07億銀），亦講緊仲係潛水28%。
錢雋
細價股專家
本欄逢周二、三、五刊出