瞓身支持和平佔中全民投票嘅壹傳媒主席肥佬黎黎智英噚日應邀出席港台《城市論壇》，被青年民建聯主席周浩鼎開拖，又遭愛字頭成員指罵；但見慣大場面嘅肥佬黎三言兩語就K.O.兩位低水平挑機男。
城壇噚日移師港台舉行，包括保衞香港運動發起人傅振中在內嘅愛字派依舊「捧場」。肥佬黎一見佢哋，高舉雙手豎起拇指話：「我以為今日落雨改地點，會同你哋班屎忽當大腦嘅人緣慳一面」；其後傅聽主持謝志峰話坐低，獲謝讚聽話後，肥佬黎再進擊：「傅振中你一啲都唔聽話，你好樣衰！」
肥佬黎台上亦擊倒周浩鼎，話說周攞住肥佬黎被指喺遊艇同美國前國防部副部長伍夫維茲敍舊嘅雜誌封面，質問肥佬黎身為傳媒老闆點解同唔係中國朋友嘅人交往？仲話外國對本土傳媒被其他國家投資者收購會睇得好緊。
肥佬黎反駁：「唔通傳媒只可以交中國政府認可嘅朋友？」鬧周胡說八道，「你咁後生講啲歪理，你真係無恥，喂！你轉過頭畀我睇吓你嗰無恥樣。」周真係聽話轉過頭望住肥佬黎，非常爆笑。
李八方
mailto:[email protected]
【我撐公投】網頁:
http://622popvote.appledaily.com