涼茶舖鴻福堂（1446）憑住高知名度搞上市，噚日舉行招股記者會，除咗將酒店現場佈置到好似涼茶舖咁樣，又出動着住公司制服嘅靚女模特兒，就連珍藏嘅龜鼎同埋牛奶樽都拎埋出嚟。
鴻福堂𠵱家保留住3個龜鼎，一個放喺灣仔一間復刻分店，另外兩個收埋喺倉，噚日為記者會專登喺倉度拎咗一個出嚟。呢個龜鼎有20年歷史，屬手造銅器，高1.2米，淨重80至90磅，以前用嚟蒸龜苓膏，最多可以蒸100至110盅，加埋水準備去蒸龜苓膏嘅時候，重量超過100磅。
至於放喺龜鼎旁邊嘅一個不銹鋼筒，行內叫做「牛奶樽」，但並非放牛奶，主要係以前涼茶舖工人喺舖頭後面嘅廚房煲好涼茶之後，就倒入呢個大筒內，方便拎出舖頭，倒入舖面嘅涼茶容器去賣，呢個牛奶樽實際係一個運涼茶嘅工具嚟㗎。
識睇 一定睇蘋果嘅足動世盃：
http://worldcup2014.appledaily.com/