世事紛紜，變幻莫測，好多時令人摸不着頭腦，但睇深一層呢，如果現實啲睇，不混雜空想主義，原來用兩個字已可解釋大部份複雜現象嘅成因，兩個字就係「錢」與「權」，而「權」又可轉化為「錢」。故此分析到最後，古往今來嘅世界都係「錢世界」。至於國與國之紛爭，還要加上面子因素。
例子一：內地、東南亞與非洲、中南美洲嘅高官貪污新聞不絕，因我地就在中國之內，對中國事物比較知得多啲，就不斷睇到內地最近反貪腐，打老虎已打到最高層邊緣，譬如前軍委副主席徐才厚、全國政協副主席蘇榮（曾任三省書記），夠高級嘞啩，都已經落馬，被指以權斂財，打蒼蠅則有十二名女貪官，職位不高，都係以色謀權，以肉體換取男上司賞識，坐上肥缺之後就貪污發達。
例子二：印尼第二大城市泗水有一個幾十年歷史嘅紅燈區，妓寨公然做生意，妓女數目過千，係東南亞最大紅燈區，最近市長話要清潔市容，將紅燈區拆掉改造成為現代商業中心，以為可以爭取民望，點知市民紛紛反對，要求保持「本土特色」，為了甚麼？咪又係工作職位與生活、金錢有關囉。當地人唔識「道德」？唔係啩，錢大過天而已。
例子三：澳洲係先進國家，地廣人稀，空氣好，環境靚，年前左丁山到墨爾本旅行，一位中大校友用車載往紅酒莊園區遊覽，行經一條快速公路，行足十五分鐘，路旁還是見馬不見人嘅牧場，校友話，呢啲地根本無人問津，與香港乜地都要搶嘅情況唔同。另一位校友曾移民塔斯曼尼亞區，買咗一間八千平方呎嘅「大屋」，佢話「被迫如此」，因為想搵間細啲嘅都比較難。好嘞，就係呢個塔斯曼尼亞島，內有一個一萬五千八百平方公里（佔島面積之20%）嘅森林荒原屬世界遺產，但澳洲政府要申請將其中嘅七萬四千公頃（香港打晒大交之新界東北發展區只有614公頃）剔出世界遺產名義，以便澳洲可以發展伐木業，輸出木材，刺激造紙業，製造新工作職位，即係講錢啦！環保團體當然反對，澳洲係民主選舉國家，呢啲事有排爭論。
例子四：李克強訪問英國，先見英女皇飲tea，再到唐寧街十號傾生意，中英兩國簽咗300億美元近40項生意協議，卡梅倫於是對香港問題收聲，總之睇錢份上，那敢得罪超級大豪客噃。
還是那一句，金錢不是萬能，無錢萬萬不能，私人與國家皆會見錢開眼。