新世界中國（917）上星期因人頭票不足而拉倒私有化議案，很多人立即抽水，笑新世界發展（017）主席鄭家純太純、太天真，更重提他花名solution（諧音「傻佬純」）。本地富二代中純官肯定不是最精明一個，但極有可能是脾氣最好一個。
人做太子爺，佢做太子爺，據中環人士報料，純官多年以來被唔少老臣子當「透明」，有事都直接搵老闆鄭裕彤，當中有位老臣子更長期人前人後稱呼純官做「鄭先生」，有事找第三者傳話。當時假假地仲係董事總經理的純官，就這樣被架空多年。
俾着一般人應該堅嬲，但公司冇人見過純官發脾氣。又據講純官即使不滿，都只會在辦公室「擔天望地」，等對方講到冇癮自己行開，而不會開火罵走人。
做財經公關最大「收穫」就是見盡有錢佬人前人後兩個樣，尤其是人前做好好先生、擰轉背就拆蟹雕大花那一種，他們最識折磨幫自己做事的人，純官是少數仲會當公關是人類看待的有錢佬。
試過一次新世界公司飯局坐滿一圍，純官看着兩個站在一旁侍候的女財經公關，問點解不讓她們坐？當然你可以笑他出於好色才「賜座」，但更多被服侍慣的人，根本不會bother有此一問。
純官這種「順得人」性格當然也會製造公關災難，曾經有個靚女記者在業績會後，直接問他手提電話幾多號。
當面拒絕是常識吧，但他真的照答。唔怪得很多做刁的中環人，最想搭路搵純官科水。不過今時今日要純官落叠冇咁易，皆因他身邊有位律師做軍師。邊位律師咁有料？看官留意下早年娛樂新聞就會知答案。
何淑茵
mailto:[email protected]