「一剔牌」搞嘅《WINNER STAYS》4對4，噚日就移師油麻地榕樹頭公園嘅天后古廟門前舉行，可惜賽事受天氣影響，場地非常濕滑，大大影響進度，下晝天氣稍為好轉，搵咗歐陽耀冲、曾錦濤、梁振邦同曾至孝等甲組腳踢嘅邀請賽先可以如期進行。
雖然比賽場地細細哋，每隊仲踢4個人，不過，對球員技術要求好高吓，加上來回轉折，好快踢咗幾分鐘已經喘晒氣，幾個甲組腳話，喺榕樹頭天后古廟踢波確實有新鮮感（下圖）。各站預賽成績優異嘅隊伍，下個月有機會去到文化中心踢決賽。
原先以為今季約滿傑志，所以轉會東方嘅曾錦濤，噚日蒲頭自然被問到新季去向，佢同求大俠講，呢個年紀確實需要爭取多啲出場機會，所以先諗轉會，但既然同傑志仲有約，傑志亦有好重要嘅亞協盃8強，甚至4強同決賽要應付，同球會溝通後，上半季會留隊全力幫傑志打好亞協同本地賽事，到季中再由東方同傑志傾佢嘅轉會問題。
【我撐公投】網頁:
http://622popvote.appledaily.com