無論你去過日本幾多次，總有再去嘅原因。鍾意去東京掃貨，產品款式夠潮夠新，日本售後服務確係做到No.1。
Uniqlo嘅母公司迅銷（6288），旗下另一個女裝品牌GU登陸涉谷，仲推出一個另類試身服務。
主攻fast-fashion、平價少女服飾嘅GU，上周三推出「先試身、後付款」嘅服務。顧客可以揀啱款後試身，如果啱心水只要在店內櫃位登記後，唔使畀錢就可以着新衫去街街。
GU試着活動幾乎無乜限制，不過每日只提供30個名額，先到先得。想試身嘅客人只要留低電話號碼同姓名，喺舖頭收工前還衫就得。如果顧客試身後發現唔啱心水，返店內退貨就得，一個仙都唔使畀。不過，GU都顧及衞生問題，凡俾客人着過嘅衫都唔會再上架，只會留番畀櫥窗公仔。GU亦好信得過幫襯嘅客仔唔會係貪心之徒。
GU毅然推出另類試身服務，都係公司相信日本人夠自律。相信大家去過日本旅行亦感受到，路人唔會衝紅燈，上落扶手電梯亦靠邊站立。GU計劃明年殺入香港，屆時與H&M、Zara及forever 21搶生意。其實香港嘅絲打都習慣咗去呢類舖頭「扮買衫」，即係試咗、買埋但唔剪牌，一個禮拜後着完就拎番去換款或者要求退錢。假如GU喺香港推免費試衫，多數一借無回頭！
C+B
本欄逢周一刊出