世界盃分組賽話咁快就踢到尾輪，今晚A、B組各自同步鬥波，要刺激就梗係睇巴西嗰組啦！但我反而對B組更有興趣，雖然呢組肯定由荷蘭同智利出線，睇落好似冇咩競爭性咁，不過橙軍由開賽到家陣都有姿勢、有實際，今場應該都有悅目表現，要偷師學嘢要睇佢嘞！
澳洲對西班牙呢場話就話係例行公事箒，但出名有鬥心嘅澳洲對住上屆冠軍又點會放軟手腳，就算出咗局都博升世界排名啦！西班牙就更加要盡地一煲，決賽周兩場表現都咁令人驚訝，其實佢哋隊中嘅皇馬、巴塞球員都係超班，由沙維、恩尼斯達同布斯基斯組成嘅巴塞中場鐵三角更係冇得輸，點知教練迪保斯基偏偏鍾意用迪亞高哥斯達嚟踢「4-5-1」，呢個可能係狂牛踢到不知所謂嘅主因。
希望最後一場，迪保斯基懸崖勒馬，用番佢哋最掂嘅「無鋒陣」，等嗰班4年之後世界盃都未必再關佢事嘅老將沙維、韋拿同今屆被人鬧爆嘅卡斯拿斯等，唔使含淚Say Goodbye。講真作為球員嘅，盡咗力踢得好都係輸嘅話，都叫心服口服，鬼叫對手係勁咩；但好似西班牙咁，明明個個超晒班，有捧盃能力，點知踢到咁樣真係死唔眼閉啦！Anyway，我已經mark實個friend（圖），買齊零食，準備今晚睇晒咁多場喇！Yeah！
文：許家樂
識睇 一定睇蘋果嘅足動世盃：
http://worldcup2014.appledaily.com/