【6.20-6.29投票】
梁振英治下兩年香港極速變色，國務院的一國兩制白皮書更敲醒溫和、沉默大多數的中產參加全民投票。住九龍塘又一村的陳先生曾是「梁粉」，對其競選口號「求變」充滿冀望，但梁當選後政綱未兌現，更換來國民教育、港視不獲發牌和新界東北發展的風暴。陳先生慨嘆這兩、三年越來越理解長毛梁國雄的抗爭方式，盼望今次這票為爭取真普選邁步。
記者：潘柏林 李雅雯 蔡元貴 林俊謙
陳先生自言2012年特首選舉時對梁振英信心十足，「當時選舉，我好支持梁振英求變，選舉過程中講就講得好，到佢上任後就冇做到」。他批評梁班子上任後，根本未解決房屋和丁屋問題，國教洗腦和港視不獲發牌更令他上街，他指現屆政府已變成跛腳鴨，「梁振英再係咁落去，講真一個政府係work唔到，你冇市民去支持，任何政策推出嚟一定死」。
理解激進議員抗爭方式
面對梁班子拒絕聆聽市民意見的管治方式，陳先生坦言對立法會激進議員多了一份理解，「以前我對陳偉業、長毛所做嘅一切都會不滿，點解有人會投票支持佢哋㗎？但呢兩、三年，我越嚟越發覺，基層受咗好大嘅壓力，無論房屋定財政壓力，以至支持佢哋同特區政府對抗，我由唔認同佢哋嘅做法，到今時今日，我基本上認同佢哋做呢樣嘢，如果佢哋唔做呢樣嘢，基層嘅人冇能力表達到意見」。
陳先生認為香港亂局癥結在於小圈子選舉，特首未能照顧中、下階層利益，他希望一人一票真普選可以改變局面，港人並非對抗中央，只是想有自主權解決香港問題。
他又稱全民投票向中央表達爭取真普選決心，若政府提出有篩選方案寧願否決，「講真唔好講等四、五年，可能分分鐘十幾廿年都好，我就照等囉！如果你整一個方案根本係𠱁你入局，𠱁緊香港人冇意思」。
在內地工作10多年的港人黃先生，昨趁假期趕返香港投票，他在投票時漏了選擇第二條問題，特意由銅鑼灣重返九龍塘票站查詢，確保選票有效。
他指在內地見盡人們面對不公義時麻木認命的態度，「好憎佢哋遇到唔合理嘅事，就話『係咁㗎啦！』」他說在內地謀生多年，仍對要「走後門」感不甘心，希望香港人繼續不平則鳴，守護核心價值、一國兩制，「雖然未必有結果，但起碼我有咁做過」。
【我撐公投】網頁:
http://622popvote.appledaily.com