德 叔：福嬸，陣間你出去送外賣嗰陣，順便幫我買幾排筆芯電番嚟，3A喎，唔好買錯呀。
艇仔張：德叔，買咁多電芯做咩，茶記陣間停電，你幫電筒入定電芯呀？
德 叔：啋過你把口，𠵱家香港仲未同大陸買電，邊有咁易停電，我係換定電視機搖控啲電芯，因為嚟緊世界盃分組賽踏入最後一輪，同時間踢兩場，係咁撳嚟撳去轉台，好快冇電㗎。
肥 頭：係喎，唔經唔覺都去到最後一輪分組賽，艇仔張，有咩心水呀？
艇仔張：星期一A、B組就先踢最後一輪分組賽，B組荷蘭同智利已經出線，佢哋呢場想點真係好難估；A組就明顯啲，巴西對住肯定出局嘅喀麥隆，贏波出線冇問題啦。
肥 頭：不過我上網睇啲討論區，有人話擔心巴西走線喎，會唔會特登和局博次名㗎。
德 叔：我就唔係咁睇嘞，巴西今屆賽事都算係正氣，上仗贏唔到墨西哥，因為對手有個神龍上身，今次我又唔信喀麥隆頂得幾耐。
艇仔張：不過咁喎，馬會呢場「讓球主客和」開到[-2]，又真係鬼鬼哋，之前阿根廷對伊朗又係開[-2]，阿根廷幾辛苦先靠美斯補時入波，僅僅熟贏一球，「主勝」我就一定唔買，想好分，不如買「讓球主客和」「和局」啦，有4.2倍。
福 嬸：艇仔張都幾有道理，我一於照跟，𠵱家就出街買。
【我撐公投】網頁:
http://622popvote.appledaily.com