福 嬸：
艇仔張，你幫我睇下前日呢張飛有冇得收錢呀？
艇仔張：
哥斯達黎加（圖）受讓半/一，你買下盤，中啊！去收錢啦，福嬸。
艇仔張：
勁喎福嬸，你真係有啲賭運，但邊個教你買哥斯達黎加咁醒㗎？
福 嬸：
哈哈，你知我都唔識㗎啦。我都係入去投注站，順手攞份免費派嗰啲報紙睇咋，之後咪照住佢啲貼士買囉，點知真係中喎！
艇仔張：
咁我又真係估唔到哥斯達黎加贏到，你贏錢就大把人輸錢囉！
德 叔：你哋睇吓祥Hi唔出聲，坐埋一邊，就知啦！
艇仔張：輸錢佢成日都有，我覺得係佢嘅意大利前日輸波，所以唔開心！
祥 Hi：
喂，你哋以為講我，我聽唔到呀？
艇仔張：意大利仲有機會喎，打和烏拉圭都得啦，要傷心都係英格蘭球迷先啦，幾時輪到你。
祥 Hi：
英格蘭算罷啦。反而𠵱家烏拉圭呢輪贏波，仲要阿蘇復出入波，意大利就輸，到時對碰，氣勢都輸畀佢哋啦！
福 嬸：
嘿，祥Hi，唔使咁灰心，最多下場我撐意大利！不如教我今晚點買啦，我諗住乘住啲運再去馬。
祥 Hi：
哥斯達黎加都爆到冷，咁你今晚買俄羅斯囉，我想睇吓你係咪真係咁夠運。
福 嬸：
係啊，好似普京都話會去撐場睇世盃嘛，可能呢隊波有啲士氣！
艇仔張：
哈哈，福嬸，唔通我哋特首場場嚟睇波，香港就場場贏咩？
識睇 一定睇蘋果嘅足動世盃：
http://worldcup2014.appledaily.com/