今屆世界盃被視為「黑馬」嘅比利時，第一場分組賽勉強地反勝阿爾及利亞，踢落有「雷聲大、雨點小」嘅感覺，可能未搵到適用嘅入波方法，好辛苦先入到波。但係其實比利時隊中粒粒皆星，前線有好多位有實力、有名氣嘅球員，今日就介紹吓啦。
夏薩特魅力四射
上場比賽長期俾兩個守衞緊盯嘅夏薩特（圖）就一定要識，呢位10號仔就咁睇唔算特別靚仔，叫做五官端正啦。不過一踢波就絕對魅力四射，夏薩特個人突破及埋門能力驚人，至少需要兩個球員緊纏，先可以減少佢嘅威脅；好似上場波雖然自己冇入球，但就為隊友分散咗好多敵方嘅注意力。
另外，不妨留意吓比夏薩特靚仔啲嘅中場球員梅頓斯，上場比賽入替後表現搶境，仲要入奠定勝利嘅一球，今晚對俄羅斯好大機會爭到個正選。
咩叫「魚生粥」？
有時球賽結果會被稱為「魚生粥」，即係僅僅熟，意指兩支球隊實力相若，贏波嘅一隊都只能好辛苦咁僅僅贏一球，希望今場比利時唔會再好似上場咁煲「魚生粥」。
文：陳婉婷
太陽飛馬助教
識睇 一定睇蘋果嘅足動世盃：
http://worldcup2014.appledaily.com/