阿根廷球王美斯早前接受日本體育競賽節目《炎之體育會》邀請，同「人工智能鋼龍門」（Robokeeper）對決，4射兩中，而呢部智能足球門將Robokeeper月初登陸荃灣嘅愉景新城，噚日請咗東方幾位本地球員同呢部智能鋼門對決，連已掛靴嘅副總監歐偉倫亦有落場玩吓，試射成績仲拍得住美斯，連球迷亦搵「金毛倫」教路。
由4 attention研發嘅「人工智能鋼龍門」，堪稱最強鋼門，因為呢架機械門將撲球時加速率比一級方程式賽車仲要快17倍，擋球成功率超過90%，0.3秒就可撲到時速高於100公里嘅高速射球。東方噚日由副總監歐偉倫同助教黃鎮宇率領鄭少偉、姚學文同文彼得到場，挑戰共分7級難度嘅「鋼龍」。
有「亨利」之稱嘅鄭少偉試射5級難度，已經唔係好多球入到，後尾仲調高到適合職業足球員測試嘅7級難度。由於副總監歐偉倫下令要射入先准走，幾個球員花咗唔少時間先至射破「鋼門」，當中姚學文試過好多唔同位置都唔成功，最後試超過10球，先射到左上角死位，終於可以走人。
射上角好過地波
收山多年嘅歐偉倫，上季不時跟隨球隊操練，狀態算唔錯，擺定射波始終有功架，結果挑戰7級難度，射咗4球，最後仲入咗兩球，成績拍住美斯；連在場吼路嘅球迷都即刻搵佢指點，點射先入到。「阿倫」話，基本上勁射兩邊中腰波同地波，人工鋼門都會撲到，但射左右上角，未必要太大力，最緊要線路啱啱彎過龍門隻手，就有機會入。球迷想試自己射門技術，可以到愉景新城試試，只要購物滿100蚊，就可以射3次龍。
美斯誓捧盃剃巴西眼眉
至於𠵱家身在巴西嘅美斯，就坦言今屆要為阿根廷捧走世界盃。佢日前接受英國《太陽報》嘅訪問時話：「我希望喺呢個夏天，阿根廷會成為世界冠軍，我到巴西參賽，就係要成為王者。如果我話覺得阿根廷喺巴西奪標一啲都唔特別就梗係呃你嘅。決賽喺馬拉簡拿球場由巴西鬥阿根廷，嘩！簡直係夢想。」
不過，佢都為自己同阿根廷隊友鋪定下台階：「如果我哋無法奪標，相信絕對唔係因為我哋唔夠盡力。」
識睇 一定睇蘋果嘅足動世盃：
http://worldcup2014.appledaily.com/