今晚幾場波，首要梗係撐比利時啦！而美國對葡萄牙嗰場都係焦點喎，上場葡萄牙對住德國喺踢少個之下，不幸俾人哋大炒，雖然神級戰將C朗在陣，但佢啲隊友表現就唔係咁生性，唔配合佢都算，仲旨意晒佢入波，搞到C朗踢得冇癮外，我哋班球迷都睇到着晒火。
今場後防又冇咗比比，成條防線好似進入咗絕境咁，要喺決心咁大嘅美國身上攞分，唔通真係要好似廣告咁置之死地而後生，響險境中博番鋪，冒死將威力推至極限？
另外，早兩日我去咗學校謝師宴（圖），成晚同老師講得最多嘅除咗係Thank You外，竟然係波經。教通識嘅林sir同我一樣撐巴西，佢話班「森巴兵」有主場之利，又有世界級中堅坐鎮，佔盡天時地利同人和下，唔攞冠軍可以攞咩呀！
可惜今屆啲波全部凌晨開波，睇完都夠鐘返學啦！究竟作為老師嘅佢又點頂呢？林sir話好彩𠵱家學校考緊試，未開波就改吓卷當提神囉，睇完波返到學校都係監考，所以頂得住，況且世界盃隔4年至有，冇理由唔睇嘅。咁你話世界盃嘅魅力係咪沒法擋先，今次真係阿sir也瘋狂呀！文：陳子樑
識睇 一定睇蘋果嘅足動世盃：
http://worldcup2014.appledaily.com/