俗語有云：三歲定八十，呢句話係指個人性格而言，即係話一個人嘅性情、性格好多時在細路仔時期已經顯示出嚟，主要特徵一世都難改變。
左丁山唔係幾相信呢句說話嘅，畢竟三歲時兒童不懂掩藏，真情流露，在成長過程中，如捱過去，受過責罵，或者遇上良師益友循循善誘，一個人嘅性情與性格點都會改變嘅。
多年前左丁山有一位trainee，出自富有家庭，自細在鄉村俱樂部玩到大，故此認識不少有錢世叔伯，佢當年只有廿零歲，周時同一位富豪世伯打網球，每逢星期一返工就呻：「又俾T伯伯搵咗笨。」T伯伯原來唔會出錢租場嘅，打波乜錢都係由N仔出，有一次打完波食個菠蘿包飲可樂，都係N仔掏腰包去買。左丁山叫N仔唔好咁笨，點知N仔話：「你教嘅，釣大魚要放長線吖嘛，T伯咁鬼有錢，我同佢咁好，始終有一日做到佢嘅刁啩。」哦，理論上係嘅，一年後T伯就搵我地公司做財務顧問，左丁山帶住N仔操刀，寫好報告後就冇咗下文，數又唔找，後來公司董事A（今天財經界大名人）話：「唔收錢算賣個人情俾阿T啦。」於是N仔以後都再冇同阿T打波。
呢日有長輩賜飯，左丁山坐定定聽兩位前輩講中環掌故，世界原來咁細，竟然會講到阿T。原來阿T小時候在著名男校就讀，校長係神職人員，對學生極其愛護，不喜懲罰學生，一味力求感化之。阿T某次考試出貓，俾老師捉到正，報告校長，校長不予懲罰，反而請阿T到學校教堂講道理，同佢一同跪在壇前向上帝禱告，請求寬恕小孩子錯誤犯規。同學在外見到此情此景無不動容，以為阿T一定會發憤自強，不再走僥倖路線，點知不久之後又有測驗，阿T再次出貓，老師早已吼實，即刻捉咗阿T去見校長，校長無奈，為了安撫教師及其他同學以示公正，將阿T掃出校門，創下學校歷史。阿T係精叻仔嚟嘅，又著名慳家慳人工慳材料錢，後來發咗大達，但成班同學都怕咗同佢打交道。左丁山聽完，回憶番昔年N仔與阿T打網球之故事，不禁想起「三歲定八十」之言，世界上確有呢類事。