中國保釣期間，憤青曾經高呼「釣魚台是中國的，蒼井空是大家的」；不過嚟到世界盃，中國冇份出線，日本AV女優蒼井空（右圖）就梗係歸番自己國家。蒼井空周五朝早捱住眼瞓支持日本，不過大和民族就唔爭氣，打多個都贏唔到希臘，悶和0:0，兩戰只得1分，要喺C組出線就真係好難。
30歲嘅蒼井空出身AV界，不過從良後專注拍電影、廣告等，喺日本同中國人氣都好勁。擁有「童顏巨乳」嘅蒼井空對體育亦都好熱心，之前支持過中國女網球手李娜，到世界盃就捧番日本。星期五凌晨佢就喺Twitter不斷留言，好似3點英格蘭對烏拉圭開波，佢就話雖然好眼瞓，都要睇埋呢場波。空妹果然耐力十足，6點開波前又見到佢留言，一邊落力打氣，一邊就話今仗日本如果贏唔到，出線形勢就好危。而且佢都好留心日本消息，仲大讚去到巴西睇比賽嘅同胞有公德心，識得執番啲垃圾。
11打10僅和希臘
不過有空妹力捧，日本都係唔爭氣，希臘隊長加素蘭尼斯38分鐘兩黃一紅被逐，日本咁多時間以眾凌寡，都係入唔到波，包括空妹深愛嘅內田篤人近門射斜，老將大久保嘉人仲對空門打飛機㖭。日本教練沙哲朗尼賽後就話：「我哋賽前目標係全取3分，而且亦都有好多機會，可惜冇辦法轉化做入球。」賽前日本就爆發內訌傳聞，唔知係咪因為咁，曼聯中場香川真司被貶為後備，而賽後亦有消息指，沙哲朗尼心灰，決定完成世界盃後就辭職唔做。
雖然日本兩戰1和1負只得1分，出線都唔係完全冇機會，最後一場必須擊敗提早出線嘅哥倫比亞，再希望科特迪瓦贏唔到希臘，同分之下博得失球差，睇吓有冇計啦。
【我撐公投】網頁:
http://622popvote.appledaily.com