西班牙呀西班牙！上屆你就威到盡，捧走個世界盃，今屆你竟然踢得衰到冇朋友，頭兩場都失晒威，完全交唔到貨，分組賽都未踢完就俾人踢出局，仲要加埋入得1球，兼且係靠12碼至攞到。雖然我並唔係西班牙Fans，但係昔日王者墮落到呢個地步，都真係慘不忍睹。
講完呢隻「爛牙」，睇吓今晚嘅激戰先，由於我嘅考試同分組賽一樣都進入尾聲，考埋下星期五嘅maths就完成任務，所以今晚可以睇盡啲，德國對加納一定係精選啦！因為有我No.2偶像奧斯爾出場，今晚又點可以錯過。
除咗世界盃外，近期同班波友間仲有一個熱話，就係Winner Stays 4打4嘅比賽（圖），我都組隊報咗，遲啲7月頭響尖東文化中心出面踢，有啲friend就呢兩日響廟街同榕樹頭率先落場。諗落件事其實幾型，你話有幾可會響咁旺嘅地方踢波吖，仲係平時街場跟隊咁踢法，贏咗留低，輸咗就out，和波仲要一齊走，都咪話唔激，到時真係要盡情發揮小宇宙啦！文：許家樂
識睇 一定睇蘋果嘅足動世盃：
http://worldcup2014.appledaily.com/