波斯尼亞上周雖然輸俾阿根廷，但比賽表現出水準，今次對隊比較容易應付嘅尼日利亞，如果體力上同班非洲兵可以相提並論嘅話，拎3分爭出線應該唔係問題。自從我哋飛馬由波斯尼亞引入前鋒拉斯錫，再加上佢真係響曼城訪港期間去同迪斯高（圖）飲咖啡，我就開始更留意波斯尼亞嘅球員喇，唔知大家又識幾多個呢？
迪斯高最型
見到拉斯錫我就諗起迪斯高，佢哋雖然級數未必相近，不過位置同類型就好相似。迪斯高係典型中鋒，制空力同把握力強，同隊友做二傳同掩護都唔錯，係波軍嘅進攻第一點；而且佢高大威猛，行出嚟甚有氣勢，同拉斯錫行上台拎神射手個感覺一樣咁型！仲有佢中場拍檔，喺中超踢到曉飛嘅米斯莫域，非常穩重，係全隊經驗最夠嘅球員；𠵱家中超仲係季中，相信佢狀態一流，有能力炮製入球。
頂波撐龍舟
「撐龍舟」唔係端午節嗰隻呀，係球場上當有球員用頭頂個波去後面，動作似撐後，所以叫「撐龍舟」。迪斯高有高空優勢，應該有唔少機會「撐龍舟」，幫隊友二傳。
陳婉婷
太陽飛馬助教
【我撐公投】網頁:
http://622popvote.appledaily.com