米高仔：德叔，整個A餐，凍檸茶少甜，唔該。
德 叔：又係外賣呀？
米高仔：唔係，今日我大把時間，堂食呀唔該。
福 嬸：呢排世界盃，你哋啲樓上波衫鋪唔係忙到唞唔到氣咩。
米高仔：開波頭一個星期就係，不過香港人捧開啲名牌球隊，好似西班牙、英格蘭（圖），完全唔掂，西班牙出埋局㖭，生意真係跌得好勁。
肥 頭：都唔係呀，都爆到啲黑馬出嚟。
米高仔：唉！香港人信名牌，開波前我仲入咗幾百件西班牙同英格蘭，相反哥倫比亞就冇乜入貨，𠵱家要諗點清貨。
肥 頭：星期日葡萄牙對美國，如果再有咩閃失，隨時陪埋西班牙出局，你啲C朗波衫又係窄窄哋。
米高仔：唔提猶自可，諗起個比比，真係嬲到想打死佢。
德 叔：咁又唔好咁燥，德國呢場波又真係踢得幾好，今朝我都見幾個客着住德國波衫食早餐。
米高仔：好彩都叫有德國、荷蘭頂得住。
艇仔張：嗱，你咁驚葡萄牙再輸，不如我就教你好似股票咁做對沖，星期日，你就買重注美國贏，有4.45倍，萬一葡萄牙真係輸，你都收番啲錢幫補吓。
人物介紹：
德 叔：旺角茶仔老闆
米高仔：旺角波衫鋪老闆
福 嬸：茶餐廳侍應
艇仔張：扮專業賭友
識睇 一定睇蘋果嘅足動世盃：
http://worldcup2014.appledaily.com/