法國隊喺首輪賽事以3:0輕取實力一般嘅洪都拉斯，整體發揮不俗，梅開二度嘅前鋒賓施馬或者會係好多人嘅焦點，但係有一個位置成日都俾人忽視，今日就為大家介紹吓法國隊嘅門神洛里斯。
洛里斯最英勇
現年27歲效力英超熱刺嘅洛里斯（圖），俾人成熟穩重嘅感覺，眼神有啲王傑feel，憂傷得嚟又有火，絕對係嗰種瀟灑型男。洛里斯近年表現漸趨穩定，令球隊冇後顧之憂，最有印象係佢曾經喺比賽被「猛獸」盧卡古強力衝撞後倒地，一度冇咗知覺同失憶，迅速醒過後仲抗拒領隊指示，拒絕被換走，最終作戰到完場。雖然洛里斯咁做對自己同球隊都唔好，不過呢種熾熱嘅火又未必咁容易喺其他球員身上搵到，總有值得尊敬嘅地方。今晚法國對瑞士，大家不妨一齊留意吓呢位熱血門將嘅表現。
門將屙蛋醜死人
球場上有時守門員會出現「屙蛋」，係話守門員接波時出錯，俾個波從胯下漏入網窩。今屆世界盃個波咁飄，對守門員嚟講係一個考驗，不過相信洛里斯呢種級數嘅門神應該唔會「屙蛋」。
陳婉婷
太陽飛馬助教
識睇 一定睇蘋果嘅足動世盃：
http://worldcup2014.appledaily.com/