睇過《變形金剛》嘅fans都知，電影中例牌出現大量靚車同飛車場面，估唔到最新一套《變形金剛4》內，竟然見到中國代表─廣汽（2238）生產嘅三款新車。公司乘用車部門總經理吳松話，係大導演米高比爾（Michael Bay）睇中廣汽，主動邀請合作㗎。
電影噚晚舉行首映禮，共有三款廣汽新車現身，其中包括概念車E-jet。故事講中國俾「狂派」攻擊，李冰冰揸住架新車「傳祺GA5」，成功逃亡到香港云云。不過，劇中三款國產車識唔識變身機械人，又打唔打得，就要入場睇先知。
吳松話，公司舊年初參加北美車展，俾米高比爾睇中，雙方一拍即合。由於米高比爾未成名前，經常拍汽車電視廣告，佢早前參觀廣汽總部，竟然話廣汽嘅廣告拍得認真一般，吳松即刻打蛇隨棍上叫米高比爾幫手，但係叫佢唔好收咁貴。