今日寫稿特別躁，皆因落筆之時：一、比利時竟然開下盤（讓阿爾及利亞球半兩球，有買自然知我講乜）；二、巴西和墨西哥（都預咗大家和平各攞一分出線，但又唔係無入波囉，我哋全部三點睇架）；三、強國隊公然作出不君子行為，你無睇錯，我講緊係六月十八日黑客入侵壹傳媒，同埋全民投票POP VOTE網站！天光時分，唯一令我有番少少欣慰，就係南韓泡菜竟然入到粒（雖然係羅宋湯龍門送大禮），之但係，我都依然好嬲。
當然，你可以話我黑客單嘢屈咗強國。咁好啦，我當佢係一個謎咁處理，但仲大鑊，因為我哋依家面對更多嘅謎：一、點解好似場場都有伏？二、點解咁多首個入球係十二碼？三、點解之後又會被狂追反勝？四、打咗十七場有四場係開主客/客主，比例咁高？五、烏拉圭點解咁流？六（你自己填埋佢）)。另外，黑客不如Hack埋馬會網站啦，然後用白皮書搬龍門話「馬照跑」，係唔包「波照賭」。
文章見街時乃六月二十日，如無意外（但六月每日都有意外），大家可以去PopVote投普選方案，就算網站摺埋，我哋都預咗行去票站排隊。喂，如果馬會網站被黑客搞，你都會死落去投注站落纜啦下話？香港隊主場必勝，滿場黑哨都係咁話，大家一齊谷飛等派彩。
文：梁柏堅
識睇 一定睇蘋果嘅足動世盃：
http://worldcup2014.appledaily.com/