油價藉伊拉克局勢動盪再度攀升，兼且唔經唔覺創咗半年高，累升咗11%。場內新時代能源（166）剛啱先喺三年超級低殘位起步，相對城中大孖沙彤叔對上一次增持價，仲玩潛水，石油天然氣股當中，新時代PB，係數一數二超低殘，先嚟轉博反彈。
2010年，新世界彤叔透過萬新企業入股新時代，買入集團過10億股，每股成本價0.31元，經2011年20合1後，彤叔每股入股成本，高達6蚊樓上，新時代家陣潛水潛到落海底，現價（0.475元）累跌90%過外。
估值殘到爆
再喺上年10月，彤叔透過周大福，以每股0.61元，增持新時代9,075萬股，集團家陣亦係潛緊水過20%。同年，新時代三次配股，配股價全部0.91元，集團家陣又係潛緊水。
新時代呢個超低殘價，PB僅得0.14倍，唔講，真係以為新時代係內房股。場內氣股，中油燃氣（603）1.8倍PB、中國油氣（702）1.05倍、天倫燃氣（1600）5倍樓上。
又石油瓣數中，近市值級數有南海石油（076），噚日大升17.9%，家陣0.23倍PB、聯合能源（467）1.9倍。點比，新時代PB，都係至殘至抵搞。
新時代剛啱2月完成收購阿根廷項目Palmar Largo（佔38.15%），日產1,600桶油，油價今年以嚟咁升法，新時代新購項目，食到應一應。而集團同中石油合營嘅六盤水中石油崑崙燃氣，亦正式喺上年尾啟動。主打瓣數，唔再係冇米粥，PB唔應該殘到咁離譜。
新時代PB，只係輕輕收窄到南海石油0.23倍水位，已經講要升67%到0.78元。但呢個水位，仲相對彤叔第一撼入主價，差好遠好遠。
錢雋
細價股專家
本欄逢周二、三、五刊出