世界盃賽事打咗一個禮拜，衛冕冠軍的西班牙話咁快被踼出局，用真金白銀捧佢蟬聯嘅球迷真係欲哭無淚，全部同西班牙有關的彩池泡晒湯，馬會就袋袋平安。
波係圓嘅，幾勁嘅球隊亦偶有失場，估邊隊波贏唔容易，近排估聯儲局議息結果反而仲易中。英倫銀行終於吹風加息，加上美國通脹近月升返唔少，部份傳媒揣測聯儲局今次可能露鷹相放風提早加息。不過，有留意開儲局動向的，都知道儲局在加息上一直主張有遲無早，而議息結果果然「冇料到」，證明傳媒好多時諗多咗。
今次儲局會後聲明提到，美國經濟已擺脫首季雪災影響重踏復蘇之路，所以今次僅僅降低今年增長預期，未來兩年的增長預測就不變。會後聲明舊調重彈，講明他朝結束買債後，低息情況要維持一段日子。喺會後記招，有記者窮追猛打，問耶倫所謂一段時間即係幾耐，耶倫就耍太極冇交代，淨係話並非鐵板一塊，要參考好多方面數據和因素，冇方程式計得到。
有記者問到點睇通脹近期升溫情況，耶倫就好淡定咁話，呢類數據偶有噪音，言下之意係數字間歇性飄忽不足為懼，至緊要係儲局認為通脹仍在估計之內。佢又派定心丸，話儲局有足夠工具調整息口，通脹或經濟行得快，息口就加快啲，反之亦然。
據儲局最新經濟評估，美國未來兩年通脹會慢慢上返，其中儲局最重視嘅個人消費開支（PCE），今年輕微上調至1.5%至1.7%，而2015年介乎1.5%至2%，2016年介乎1.6%至2%，同之前預測相差無幾，仍處於2%的儲局安心範圍。
息魔未現身 非美發威
耶倫繼續撐低息，美元昨日明顯受壓，英鎊終於企穩1.7美元，執筆時高見1.7028美元，續創五年新高。對上兩星期本欄提過，英國經濟理想，早前屢次上衝1.7美元關口無功而還，主因欠缺央行吹風加息呢個東風，估唔到話口未完東風咁快到，繼英倫銀行行長卡尼上周五放風可能提早加息後，周三出爐嘅央行會議紀錄亦同一口徑，指市場低估央行年底前加息的機會，加上儲局續撐低息連累美元，形勢造就英鎊成功破關。如果英倫銀行真的有意今年內加息，有機會好似紐元過去年多咁go go go。
新西蘭上季GDP增長3.8%，是六年來最勁，加上經常賬盈餘刷新紀錄，上周開車的紐元本周再上，昨日衝上87.38美仙，創一個月高位，今年至今累積上升6.3%，表現冠絕所有主要貨幣。期權市場走勢顯示，紐元今年有72%機會挑戰88.43美仙的歷史新高。
奇兵
本欄逢周五刊登