貴為內房打工皇帝嘅恒大地產（3333）總裁夏海鈞，雖然舊年人工少咗四分之一，大約只袋4,000萬人仔年薪，但係佢呢期就頻頻減持恒大股份當補貼。根據聯交所資料，淨係今個月佢就行使購股權，沽貨套現逾9,500萬元。
恒大今年3月公佈業績時大派股息，夏海鈞就趁4月中同今個月兩輪股價高位沽貨。
按聯交所資料顯示，佢本月六次行使購股權沽出合共2,582萬股，作價介乎3.685至3.74元，套現9,529萬元；扣除每股認購成本2.4元，淨袋超過3,300萬元。佢今年4月亦三度沽貨，套現共1億元。兩輪沽貨合共套現接近2億元。
夏海鈞密密沽貨呢件事亦引起小股東關注，本周一喺股東會就俾小股東問到，佢不停沽貨係咪有意唔撈時，佢就澄清話唔係睇淡公司前景，減持只係個人財務安排咁話喎。